^*donac/i

(tr)

Senkompense doni, kiel ateston de bonvolemo, amikeco, favoro, ktp: mi ja ne donacas al vi tiun ĉi monon, mi ĝin pruntas [1]; jen, mi donacos unu pomon al vi [2]; li donacos al li la vivon, se li alportos […] ĉevalon, kiu kuras pli rapide ol la vento [3]; donacu ŝin al mi, ĉar mi ne povos vivi [4]; naztukon kun sia nomo ŝi donacis al la ĉasisto [5]; (figure) la naturo donacis al ili neordinaran forton ^Marta ; ŝi donacis al la reĝo cent dudek kikarojn da oro [6]; la estroj de la Levidoj, donacis al la Levidoj por la Paskoj kvin mil ŝafidojn [7]; (figure) li akiris alian koron, ankoraŭ antaŭ ol mi havis koron, por donaci al li (t.e. ekami lin) [8]; (figure) fraŭlino, donacu al mi vian manon (edzigu min) [9]! la reĝo donacis (kp atribui) al la ambaŭ […] kavaliran krucon kaj la titolon de sekretaj teksistoj de la kortego [10]; oni donacas por speso kaj laborigas por spesmilo ^PrV ; al ĉevalo donacita oni buŝon ne esploras ^PrV . doti, oferi

Donacitaĵo: vi estas tiel […] bona kaj tiel honesta, ke mi devas fari al vi donacon [11]; [li] dankis la maljunulinon pro la donaco [12]; mi pardonemigos lin per la donaco [13]; anonima donaco [14]; vi helpis min per konsilo kaj donaco ^Marta ; [li] donis al li returne la dokumenton de donaco [15]; per favoroj kaj donacoj oni solvas multajn malfacilaĵojn [16]; kiu donacon prenas, tiu sin katenas ^PrV ; donaco nesincera estas donaco infera ^PrV .

Kiel donaco(n): donace ricevi, prezenti; la arĝenton [li] sendis […] donace al la reĝo de Asirio [17]; tio estis lia poeta talento, kiun Dio donace metis al li en la lulilon [18]; eminenta sinjoro […] forte laŭdadis la ĉevalon […] dezirante ricevi ĝin donace [19].

Volonte donacanta: mi ĝojas konstati, ke vi estas donacema [20]; [ni] dankinte foriris, impresite de la donacema malavareco [21]; kampanjo necesis havigi subtenon apelaciante al la donacemo de la membraro [22]. malavara

Donaco de mono, ordinare por iu bonafara celo, projekto ks: li promesis ankaŭ al la aliaj iomete mondonaci [23]; [ili] ricevis de Nacia Heredaĵa Memoriga Fondaĵo rekordan mondonacegon de pli ol 17 milionoj da pundoj [24]; temploj […]j dependas de mondonaco de siaj kredantoj [25]; la „Obolo de Sankta Petro“ [estas] mondonacoj al la papo fare de milionoj da fideluloj [26]. almozo, benefico