³kontribu/i ^JED

(x)

1.

(iu) Alporti sian parton al komuna laboro aŭ ofero: [por] kontribui al la solenaĵoj […] la komercistido […] aĉetis raketojn, krakpizojn kaj plej diversajn fajraĵojn [1]; [li] ĝuas la profitojn, sed tute ne kontribuas al la laborado [2]; la tuta lando Babela kaj ĉiuj konataj fremdlandoj ŝajne kontribuis el siaj plej bonaj trezoroj al la konstruado [3]; ambaŭ celis […] kontribui al la pli bona kompreno de la aktuala pozicio kaj perspektivoj de Esperanto [4]; tiuj nur malmulte kontribuis, ke progresis Esperanto [5]. engaĝiĝi, kontingenti, kotizi, kunhelpi, kunlabori, kunpeni, partopreni

2.

(io) Esti unu el pluraj elementoj, kies ĉiu speciale utilas por komuna rezultato: senĉese novaj eltrovoj de la scienco kontribuas al plilarĝigo kaj pliprofundigo de la malnovaj scioj [6]; kun la plirapidiĝo, la voĉo plifortiĝos, kio kontribuos al kreo de ekscito kaj ĉe la publiko kaj ĉe la oratoro mem [7]; la simple meblita loko havis ĉarman varman etoson, al kiu ne malmulte kontribuis la situo tuj subtegmenta, kun kliniĝanta plafono [8]; kontribuis al ŝia stira fuŝo la fakto, ke la montra kaj meza fingroj de ŝia dekstra mano estis dike bandaĝitaj [9]. kunefiki, kunutili

Ago kontribui; tio, kion oni kontribuas: kuracisto ludis violone kaj mi akompanis lin per gitaro, tio estis nia kutima kontribuo al la amuzo [10]; pri la kontribuo de la patro al la familia bilanco oni ne povas […] kalkuli [11]; la tiurilataj laboroj de Rask kaj Grimm signifis plian kontribuon al la lingvoscienco [12].

Tio per kio iu kontribuas: tre ŝatataj estis liaj ĉiujaraj kontribuaĵoj al la jarkajero Sennacieca Revuo [13]; estas notinde kiom da helpo donis ĝiaj kunlaborantoj al la aŭtoroj de tiu ĉi libro, la nomoj de ĉiuj kunlaborintoj kun indikoj pri iliaj kontribuaĵoj aperas en la Nomaro de kunlaborintoj [14]; rekte elstaras la modesta kontribuaĵo de ĉeĥa maljunulino pri la temo brodado [15]; tiu studado […] ebligas min fari unu modestan kontribuaĵon al nia diskuto [16].

Tiu, kiu regule kontribuas ekzemple al gazeto, verko, ktp: aliĝu al la teamo de kontribuantoj [17]; nia skipo de kontribuantoj venas el multaj landoj [18]; tasko: rilati kun rubrikestroj kaj kontribuantoj, verki mem allogajn erojn, redakti kaj enpaĝigi [19].

Rim.: Kunlaborado estas pli daŭra, pli grava kaj pli intima ol kontribuado. Kontribui insistas pli pri la komuna celo, kontingenti pri propra aparta partopreno.