^*ekzist/i ^PV

(ntr)

Reale kaj fakte esti: tiel longe, kiel la tero ekzistos, semado kaj rikoltado, malvarmo kaj varmo, somero kaj vintro, tago kaj nokto ne ĉesiĝos [1]; ne ekzistas kompetentulo kaj saĝulo tia, kiel vi [2]; ĉu ekzistas nenia savo [3]? multe da malfeliĉo kaj malĝojo ekzistas en la mondo [4]! ne ekzistu ĉe vi aliaj dioj antaŭ Mi [5]; ĉu ekzistas eĉ guto da senco kaj logiko en ĉiuj tiuj ĉi spritaj mokoj [6]; ekzistis homoj, kiuj neadis la eblecon de ekzistado de arta lingvo, kiam antaŭ ilia nazo tia lingvo jam ekzistis [7]; por mi ekzistas nur idealoj pure homaj [8]; la mondo certe ekzistos plue, senfine pli longe, ol kiel mi povas imagi al mi [9]; kie ekzistas krimo, devas ekzisti krimuloj [10]; ekzistas diferenco inter la amo kiun sentas al si reciproke la gefianĉoj, kaj tiu amo, kiu alligas al si reciproke gepatrojn kaj infanojn [11]; se mia ĉeesto estas malagrabla al vi, mi povos ekzisti sen vi [12]; la palacoj, kiujn ili konstruis […] ne ekzistas plu [13]; homo senpeka neniam ekzistis ^PrV ; ne ekzistas honoro sen laboro ^PrV ; ankaŭ por diablo tondro ekzistas ^PrV . daŭri, troviĝi¹, vegeti, vivi

1.

Stato de tio, kio ekzistas: ni ricevis la ekzistadon de niaj gepatroj; nei la ekzistadon de komploto; la neekzistado de neŭtrala lingvo, religia kaj morala fundamento ĝis nun faris ĉian reciprokan fratiĝadon ne ebla [14]; doni signojn de sia ekzistado [15]; momentojn de profunda senespero, pri kies ekzistado eĉ ne scias ordinara homo [16]; ŝi komencis diveni la ekzistadon de aferoj teruraj, tamen ŝi ne tremis ^Marta .

2.

Vivo de l' homo, precipe el la perspektivo de ĝiaj bazaj bezonoj kaj kondiĉoj kaj la peno vivteni sin: esti sen rimedoj por ekzistado; malglora ekzistado; laboristino, kiu devas akiradi ekzistadon por si kaj por aliaj [familianoj] ^Marta ; treni sian senesperan ekzistadon ^Marta ; ŝi videble sentis la en ĉiu homo denature troviĝantan deziron eltiri sin el mizero kaj la al ĉiu homo apartenantan rajton plibonigi kaj plialtigi sian ekzistadon ^Marta ; li rememoris sian tutan ekzistadon: la laborojn, danĝerojn, esperojn kaj ambiciojn, kaj ĉio ŝajnis al li bagatelo [17]; li estas sana, gaja, ĝoje laboras kaj ĝuas sian ekzistadon [18].

Doktrino, laŭ kiu la homo, kies ekzisto estas komence preskaŭ nur metafizika, kreas sin mem per la elekto inter la diversaj eblaj agoj kaj per la plenumado de tiuj agoj: por tiu skolo, ekzisto antaŭas esencon; liaj poemoj montras idearojn de ekzistisma literaturo [19]; laŭ la ekzistismo ĉiu homo devas fronti al bazaj problemoj kaj temoj [20]. ekzistencialismo

1.

Estaĵo: ĉiu viva ekzistaĵo [21]; [eble vi aŭdis, ke] lingvo ne povas esti kreita en kabineto, kiel viva ekzistaĵo ne povas esti kreita en la retorto de ĥemiisto ^EE .

2.

Estulo, vivulo: vi, kompatinda ekzistaĵo, triviale naskita sur tiu sama tero, sur kiu naskiĝas ĉiuj niaj infanoj ^Marta ; tie estis tre multe da ekzistaĵoj, ĉiuj estis el tiu speco, kiun ni nomas homoj, sed ili aspektis tute alie ol ni [22]; la homoj, kiuj batalas kontraŭ vi, fariĝos neniaĵo kaj neekzistaĵo [23].

Samtempa, samloka ekzisto de du aŭ pluraj aferoj: paca kunekzistado [24].