¹problem/o ^JED

1.

Malfacila demando; teoria aŭ praktika malfacilaĵo solvenda per metodoj sciencaj aŭ socipolitikaj: astronomia, ekologia, fizika, filozofia problemo; esperanto kontentige solvis la problemon pri lingvo internacia [1]; „Aktualaj problemoj de la nuntempa internacia vivo“ (titolo de libro de Ivo Lapenna); la kvarkolormapa problemo; kiam la oratoro preparas paroladon pri aparta problemo el sia fako li tiun problemon trastudu ankoraŭ pli profunde [2]; la problemo aludata de Sokrato estas ĉu matematikaj kalkuloj estas inventitaj de la homa menso aŭ ĉu ili ekzistas sendepende [3]; la problemo pri la nombro de „pralingvoj“ estas solvita en la jafetida teorio favore al poligenezo [4]; li penis […] priradii la problemon pri eterna vivo [5]; kia diferenco estas inter la bruligado de la mortinto kaj farado de mumo? […] mi ne komprenas ĉi tiun problemon, kiun Grekoj opinias tiel grava [6].

Rim.: Paŭsante nacilingvan modelon oni ofte uzas la prepozicion „de“ anstataŭ la pli klara „pri“: nur imitita al la lingvoj naturaj „fonetika vorta lingvo“ povas solvi la problemon de lingvo tutmonda [7]; tio estas evitinda, ĉar „de“ estas ne nur malpli preciza, sed ankaŭ ĝi povas enkonduki alispecan komplementon: la kadron, en kiu oni konsideras la problemon, aŭ koncernaton, kiun ĝi suferigas, ekz-e: la plej granda problemo de la mondo, de la moderna fiziko; la ĉefa problemo de UEA estas manko je profesia mastrumado [8]. Interalie, „problemo de lingvo tutmonda“ povas esti iu aparta problemo en la kadro de tia lingvo, ekz-e iu gramatika problemo. [Sergio Pokrovskij]

2.

Ekzerco en formo de solvenda demando: aritmetika, algebra, fizika problemo; por problemoj malfacilaj de lerneja tasko li estis ankaŭ tre helpema konsilanto ^VivZam ; mi estis plene okupita je la ŝaka trimova problemo ^Ĉukĉoj . enigmo

3.

(komune) Ĝena cirkonstanco, solvenda malfacilaĵo: la unua problemo estis la loĝado [9]; mi ne havas problemojn pri mono, almenaŭ por la pano mi havas ĉiam [10]; li haltiĝis ĉe tiu grado de la ama problemo, kiam oni imagas la amon nur en la formo de la plej alta estimo [11]; viro kun serioza psikologia problemo, kiu fuŝas al li la vivon [12]; per tiu festa manĝo solviĝis la problemo de la nutraĵo por longa tempo [13]. dilemo², embaraso², komplikaĵo

solvo¹

Karakterizas ion, kio prezentas problemon, kies solvo aŭ efektiviĝo estas duba: jen la problema punkto [14]; en problemaj kazoj turnu vin por helpo al […] [15]; estus […] nepardoneble de la flanko de la komitato, se ĝi pro la problema estontaĵo rifuzus la faktan […] kaj elprovitan nunaĵon [16]. la rava virina animo, kiu faras la belan sekson tiom ekscita, problema kaj dezirinda [17]; Kaliningrado estas tre problema regiono [18]; tiaj protestpartioj plukas iun probleman temon el la vasta gamo de ĝenerala politiko kaj per tio akiras elektantojn [19].