⁴sekur/a ^PV

Estanta en sendanĝera situacio, eksterdanĝera: kiel vi vidas, oni povas ankoraŭ esti sekura en tiu ĉi mondo kaj havi trankvilan maljunecon [1]; ni povos […] kaŝi ŝin en sekura loko [2]; tie mi ne sentis min sekura [3]; la maŝinoj strangmaniere neniigis mian sekuran senton [4]; statistike ĝi estas la plej sekura sistemo [5]; oni sentis sin tute sekura apud li [6]. certa³

Stato de iu aŭ io ekster ĉia danĝero: mil pretorianoj […] laŭlonge de la vojo, gardis la trankvilecon kaj sekurecon de lia enveturo [7]; la notoj donas al la oratoro la necesan sekurecon [8]; postuloj pri kiel eble plej granda ekonomia egaleco kaj socia sekureco [9]; plena psika sekureco [10]; personeco, al kiu baza sekureco mankis [11]; mi estas nemalhavebla […], kio donas al mi senton de profesia sekureco [12]; Ministrejo pri Ŝtata Sekureco [13]; Eŭropa Konferenco pri Sekureco kaj Kunlaboro [14]; Organizaĵo pri Sekureco kaj Kunlaboro en Eŭropo [15].

(tr)

Igi sekura (iun aŭ ion): la vaga vivo sekurigis senpunecon al rabuloj [16]; li alparolos ilin kiel reprezentanto de la regna aŭtoritato […] kaj tiamaniere sekurigos al si novajn favorojn [17]; nu, konservu vian opinion, se ĝi sekurigas vin [18]; Stefano ĉerpis el tiuj vortoj okazon sekurigi sian pozicion [19]; celante sekurigi sian influon, ili toleris aŭ favoris la floradon de la Majstrokulto [20]; sekurigi iom da kontinueco [21]; por sekurigi la monteton, la prokuratoro petis la legiestron sendi […] skadron [22]. fortikigi, garantii³, protekti²

(ntr)

Trovi sekuran, stabilan kondiĉon: ju pli ni laboros por glatigi nian lingvon kaj perfektiĝi pri ĝia uzado, des pli ĝi firmiĝos kaj sekuriĝos.

Ne sekura, sub minaco, en danĝero: [tio] igis lin samtempe trankvila kaj malsekura [23]; reaktoro, taksita malsekura, estis fermita fine de la jaro [24]; ĉies vivo kaj ĉies havaĵo estas malsekuraj [25]; la regiono […] fariĝis unu el la plej malsekuraj en la mondo [26]. danĝera, malcerta, riska

Stato de tio aŭ tiu, kiu ne estas sekura, kiun minaco aŭ danĝero insidas: funde de la homa psiko […] kuŝas vastaj tavoloj da angoro, timo aŭ almenaŭ malsekureco [27]; malstabileco, krimeco kaj malsekureco en la regiono [28]; la malsekureco regas apud la kaoso en la urbo de Rio-de-Ĵanejro [29]; la malamiko de ĉiu progreso estas la malsekureco [30].