ri

(neoficiala pronomo)

Ununombra seksneŭtrala triapersona pronomo, uzata kiam la sekso de la koncernulo estas nekonata aŭ ignorinda, aŭ kiam la koncernulo identiĝas kiel neduuma: nun ri disdonas botelojn, sed antaŭe ri disdonis librojn, manĝpakaĵojn, ludojn, informojn [1]; se oni vere allogiĝas al iu, tio ofte signifas, ke oni ankaŭ ŝatas kaj respektas rin kaj ne deziras al ri malbonon [2]; blankulo ne bezonas timi ke ri ne ricevos iun esplorpostenon pro diskriminacio surbaze de haŭtkoloro [3]; „ĉu ri ĝenas vin, sinjorino?“ li diris alproksimiĝinte [4]; ri unue aŭdis pri tiu spaco kiam ri loĝis en Gangwon-do [5]; ĉiu esperantisto foje renkontas la situacion, ke ri havas dubojn pri tio, kiel esprimi ion en Esperanto, aŭ ĉu ia foje renkontata esprimo vere estas ĝusta kaj rekomendinda [6]; ri komencis prepari la koncernan juĝaferon jam en 2013, kiam la jurfirmao Clifford Chance LLP akceptis rin kiel senpagan klienton [7]; raportante pri ri en la angla, kelkaj ĵurnalistoj uzis tiun neologisman pronomon, kelkaj uzis they, kaj kelkaj sukcesis eviti la demandon, ne uzante pronomon por referenci rin [8]; amu rin kaj min, amu nin [9]; ri estis la plej pacienca kaj inteligenta hundo, kiun mi iam renkontis [10]; en la bela domo ri ne pentras plu [11]; kial gravas, kiu ri estas? [12]. li²

Rim.: En 1979 la pronomo „ri“ estis unuafoje proponita [13] kaj en 1993 ĝi aperis en lernilo intencita por lernantoj de Esperanto [14] . Ĝis ĉirkaŭ 2010 ĝi restis malofte uzata eksperimentaĵo, sed post 2010 ĝia uzado signife pliiĝis, ĉefe en junularaj rondoj en okcidentaj landoj. Ekde aprilo 2019 PMEG [15] ne plu malrekomendas ĝian uzadon, sed senjuĝe klarigas la diversajn manierojn kiel ĝi estas efektive uzata.

Posedata de ri, rilata al ri: Alekso kaj ria amiko estas ambaŭ neduumaj [16]; tamen riaj infanoj ŝajnas tre feliĉaj, kaj ili miras pri ĉiuj bestoj [17]; la petinto plejparte fajfis pri miaj korektoj, [...] kaj fine eĉ akuzis ke mi enpoŝigis rian honorarion [18]; Gaja tuŝas rian brakon trankvilige [19]; aŭ ke estas via rajto provi ŝanĝi riajn dezirojn [20]; riaj proponoj temis pri interageco [21]; ĉu la uzo de prostituo fare de unu partnero rompas rian amrilaton [22]. lia²

Uzado de la pronomo „ri“: “riismo” estas tamen jam sufiĉe disvastiĝinta, precipe inter junuloj [23]; en Esperanto, riismo povas helpi tiun celon [24]; la plej radikala propono, "riismo", estas fakte la plej laŭa al la fundamento, ĉar ĝi simple enkondukas tute novan vorton ne tuŝante la ekzistantan lingvaĵon [25]; laŭ mi, riismo ne malobeas la spiriton de la Fundamento [26].